રાજેશ વસાવે :- દાહોદ
ગુજરાત પોલીસની “One Day One District” પહેલ અંતર્ગત દાહોદ જિલ્લાની સર્વગ્રાહી સમીક્ષા
દાહોદ તા. ૧૭
રાજ્યના પોલીસ વડા ડૉ. કે.એલ.એન. રાવ દ્વારા શરૂ કરાયેલી “One Day One District” પહેલ અંતર્ગત દાહોદ જિલ્લાની ઉચ્ચસ્તરીય સમીક્ષા બેઠક યોજાઈ. વીડિયો કોન્ફરન્સ મારફતે યોજાયેલી આ બેઠકમાં દાહોદ જિલ્લાની કાયદો-વ્યવસ્થા, ભૌગોલિક સ્થિતિ તેમજ માળખાકીય સુવિધાઓ અંગે વિસ્તૃત ચર્ચા કરવામાં આવી.
બેઠક દરમિયાન રાજ્યના પોલીસ વડાશ્રી, દાહોદ જિલ્લા પોલીસ વડા અને પંચમહાલ રેન્જના IG વચ્ચે સંવાદ થયો. જિલ્લામાં અસરકારક પોલીસિંગ સુનિશ્ચિત કરવા માટે જરૂરી માનવબળ, વાહન વ્યવસ્થા અને અન્ય સંસાધનોની ઉપલબ્ધતા અંગે વિગતવાર સમીક્ષા કરવામાં આવી.
દાહોદ જિલ્લો રાજસ્થાન અને મધ્ય પ્રદેશ સાથે આંતરરાજ્ય સરહદ ધરાવતો હોવાથી, ગુનાખોરીને અટકાવવા માટે ઇન્ટેલિજન્સ શેરિંગ મજબૂત કરવું અને સંયુક્ત કાર્યવાહી હાથ ધરવા પર ખાસ ભાર મૂકવામાં આવ્યો.
આ સાથે, દાહોદમાં આવેલી પોલીસ ચોકી તથા આઉટપોસ્ટના અપગ્રેડેશન, પોલીસ આવાસ અને વિભાગીય ઇમારતોના નિર્માણ અંગેના આયોજન પર ચર્ચા કરવામાં આવી. ડિજિટલ પોલીસિંગને વેગ આપવા માટે આઈટી ઈન્ફ્રાસ્ટ્રક્ચર અને કનેક્ટિવિટી મજબૂત બનાવવા અંગે પણ મહત્વ આપવામાં આવ્યું.
પોલીસ કર્મચારીઓ અને તેમના પરિવારજનોની સુખાકારી માટેની કલ્યાણકારી યોજનાઓ તેમજ પોલીસ લાઇનના બાળકોમાં રમતગમત પ્રત્યે રુચિ વધે તે માટે પ્રોત્સાહક માળખું ઊભું કરવાની બાબતો પણ બેઠકમાં ઉઠાવવામાં આવી.
દાહોદ જિલ્લાની જરૂરિયાતોના મૂલ્યાંકન બાદ રાજ્યના પોલીસ વડા ડૉ. કે.એલ.એન. રાવે પોલીસ ભવનની સંબંધિત શાખાઓને જિલ્લાની માંગણીઓનું તાત્કાલિક પરીક્ષણ કરવા સૂચના આપી. તેમજ જ્યાં નીતિગત મંજૂરી અથવા વધારાના બજેટની જરૂરિયાત હોય તેવા પ્રસ્તાવો ઝડપથી ગૃહ વિભાગને મોકલવા માટે નિર્દેશ આપવામાં આવ્યા.
