ગરબાડાના નળવાઈ નજીક પેસેન્જર ભરેલી રિક્ષા પલટી: એક મુસાફરને માથામાં ગંભીર ઈજા,
રિપોર્ટર: રાહુલ ગારી, ગરબાડા
ગરબાડા તા.12
ગરબાડા તાલુકાના નળવાઈ ખાતે આજે એક ગમખ્વાર અકસ્માત સર્જાયો હતો, જેમાં પેસેન્જરોથી ભરેલી એક સીએનજી રિક્ષા અચાનક રોડ પર પલટી ખાઈ ગઈ હતી. આ દુર્ઘટનામાં રિક્ષામાં સવાર એક વ્યક્તિને માથાના ભાગે ગંભીર ઈજાઓ પહોંચી હોવાના અહેવાલ મળી રહ્યા છે, જ્યારે અન્ય ત્રણથી ચાર મુસાફરોને સામાન્ય ઈજાઓ થઈ છે.
મળતી માહિતી મુજબ, આ રિક્ષા ગરબાડાથી મુસાફરોને બેસાડીને ગાંગરડી તરફ જઈ રહી હતી. તે દરમિયાન નળવાઈ નજીક રસ્તા પર આવેલા એકા એક ખાડાના કારણે રિક્ષા ચાલકે કાબૂ ગુમાવ્યો હતો અને રિક્ષા રોડ પર જ પલટી મારી ગઈ હતી. અકસ્માત થતાં જ આસપાસના સ્થાનિક લોકો તાત્કાલિક ઘટનાસ્થળે દોડી આવ્યા હતા અને રિક્ષામાં ફસાયેલા મુસાફરોને બહાર કાઢ્યા હતા.
ઘટનાની જાણ થતાં જ ૧૦૮ ઈમરજન્સી એમ્બ્યુલન્સ બોલાવવામાં આવી હતી. માથાના ભાગે ગંભીર રીતે ઈજાગ્રસ્ત થયેલા વ્યક્તિને તાત્કાલિક સારવાર અર્થે હોસ્પિટલ ખસેડવામાં આવ્યો છે. જ્યારે સામાન્ય ઈજાગ્રસ્ત થયેલા અન્ય મુસાફરોનો આબાદ બચાવ થયો છે. રસ્તા પરના ખાડાના કારણે આ અકસ્માત સર્જાયો હોવાનું સ્થાનિકોમાં ચર્ચાઈ રહ્યું છે.
