રાજેશ વસાવે :- દાહોદ
*સુખસર તાલુકાના મોટા બોરીદાના ગામખેડુ માતાજી મંદિર પ્રાંગણમાં સામૂહિક રક્ષાબંધન કાર્યક્રમ યોજાયો*
*ભારત માતાકી જય અને જય શ્રી રામના નારાઓથી ગુંજી ઊઠ્યું મંદિર પ્રાંગણ; સાધુ-સંતોના આશીર્વચન સાથે જનજાતિ સમાજમાં એકતા, સંસ્કૃતિ અને પરંપરાના જતનનો સંદેશ*
સુખસર,તા.26
સુખસર તાલુકાના મોટા બોરીદા ગામ ખાતે આવેલ ગામ ખેડુ માતાજી મંદિરના પવિત્ર પ્રાંગણમાં આજરોજ સામૂહિક રક્ષાબંધન કાર્યક્રમ હર્ષોલ્લાસ અને ઉત્સાહભેર યોજાયો હતો. ભારત માતાકી જય અને જય શ્રી રામના નારાઓથી મંદિર પ્રાંગણ ગુંજી ઊઠ્યું હતું. કાર્યક્રમમાં સાધુ-સંતો સહિત મોટી સંખ્યામાં ગ્રામજનો ઉપસ્થિત રહ્યા હતા અને સંતોના આશીર્વચન તથા માર્ગદર્શનનો લાભ લીધો હતો.
રક્ષાબંધનના પવિત્ર પર્વ નિમિત્તે યોજાયેલા આ કાર્યક્રમમાં સમાજમાં એકતા, ભાઈચારો, પરસ્પર આત્મીયતા, સંસ્કાર અને સાંસ્કૃતિક પરંપરાના જતનનો સંદેશ આપવામાં આવ્યો હતો. ઉપસ્થિત ગ્રામજનોએ એકબીજાને રક્ષા સૂત્ર બાંધી પરસ્પર પ્રેમ, વિશ્વાસ, સહકાર અને રક્ષણની ભાવનાને મજબૂત કરવાનો સંકલ્પ વ્યક્ત કર્યો હતો.
કાર્યક્રમમાં ઉપસ્થિત પરમ પૂજ્ય સંત શ્રી દલસુખ બાપુએ જનજાતિ સમાજને સંબોધતા ભારતીય હિન્દુ સનાતન સંસ્કૃતિ સાથે જનજાતિ સમાજના સાંસ્કૃતિક સંબંધો અંગે માર્ગદર્શન આપ્યું હતું. તેમણે જનજાતિ સમાજને પોતાની પરંપરા, સંસ્કૃતિ, લોકઆસ્થા અને મૂળ સાથે જોડાયેલા રહેવા માટે જાગૃત બનવા આહવાન કર્યું હતું.
સમાજની સાંસ્કૃતિક ઓળખ અંગે ભ્રમ ફેલાવતી બાબતોથી સાવચેત રહેવા અને પોતાની પરંપરા તથા સંસ્કારોને આવનારી પેઢી સુધી પહોંચાડવા ભાર મૂક્યો હતો. સમાજમાં વિભાજન કરતાં પરસ્પર પ્રેમ, સંવાદ, ભાઈચારો અને એકતાની ભાવના વધુ મજબૂત બને તે માટે સૌએ સાથે મળીને પ્રયત્ન કરવા જણાવ્યું હતું.
આ પ્રસંગે સંત શ્રી પ્રવીણભાઈ બરજોડે સમાજજનો તથા ખાસ કરીને યુવા પેઢીને પ્રેરણાદાયી અને હૃદયસ્પર્શી સંબોધન આપ્યું હતું. તેમણે યુવાનોને પોતાની પરંપરાગત સંસ્કૃતિ, સંસ્કારો અને હિન્દુ સનાતન ધર્મ સાથે જોડાયેલા રહેવા આહવાન કર્યું હતું.તેમણે જણાવ્યું હતું કે,યુવા પેઢી સમાજનું ભવિષ્ય છે. તેથી યુવાનો પોતાની સંસ્કૃતિને જાણે, સમજે અને તેનું જતન કરે તેમજ આવનારી પેઢી સુધી પોતાના સાંસ્કૃતિક વારસાને પહોંચાડે તે જરૂરી છે.
સંત શ્રી પ્રવીણભાઈ બરજોડે પોતાના મૂળ ધાર્મિક અને સાંસ્કૃતિક પરિવેશથી દૂર થયેલા અથવા અન્ય ધર્મમાં ધર્મપરિવર્તન કરેલા સમાજના ભાઈ-બહેનોને પ્રેમ, આત્મીયતા અને સંવાદના માધ્યમથી પોતાના મૂળ સાથે પુનઃજોડાવા માટે આહવાન કર્યું હતું. તેમણે પોતાના મૂળ હિન્દુ ધર્મમાં પરત ફરવા ઇચ્છુક ભાઈ-બહેનો માટે ‘ઘર વાપસી’નો સંદેશ પણ આપ્યો હતો.
રક્ષાબંધનના મહત્વ અંગે સંતોએ જણાવ્યું હતું કે રક્ષા સૂત્ર માત્ર કાંડા પર બાંધવામાં આવતો દોરો નથી, પરંતુ તે પરસ્પર પ્રેમ, વિશ્વાસ, આત્મીયતા, જવાબદારી અને રક્ષણની ભાવનાનું પ્રતીક છે. સમાજનો દરેક વ્યક્તિ એકબીજાના સુખ-દુઃખમાં સહભાગી બને અને જરૂરિયાતના સમયે એકબીજાની પડખે ઊભો રહે તે રક્ષાબંધનના પર્વની સાચી ભાવના છે.
કાર્યક્રમ દરમિયાન જનજાતિ સમાજના પરંપરાગત વાદ્યોની સંગત સાથે ભજન મંડળીનું પણ આયોજન કરવામાં આવ્યું હતું. ભજન-કીર્તન અને પરંપરાગત વાદ્યોની સંગતથી સમગ્ર મંદિર પ્રાંગણ ભક્તિમય વાતાવરણથી ગુંજી ઊઠ્યું હતું. ગ્રામજનોએ ઉત્સાહપૂર્વક કાર્યક્રમમાં ભાગ લીધો હતો.
સમગ્ર કાર્યક્રમ દરમ્યાન ભારત માતાકી જય અને જય શ્રી રામના નારાઓથી વાતાવરણમાં ઉત્સાહ છવાયો હતો. સાધુ-સંતોના આશીર્વચન અને માર્ગદર્શન સાથે યોજાયેલ આ સામૂહિક રક્ષાબંધન કાર્યક્રમ સમાજની એકતા, પરસ્પર આત્મીયતા અને સાંસ્કૃતિક જાગૃતિનો સંદેશ આપતો બની રહ્યો હતો.કાર્યક્રમના અંતે ઉપસ્થિત ગ્રામજનોએ પોતાની સાંસ્કૃતિક પરંપરા અને સંસ્કારોનું જતન કરવા, સમાજમાં ભાઈચારો અને એકતા જાળવવા તથા આવનારી પેઢીને ભારતીય સંસ્કૃતિ, પરંપરા અને સાંસ્કૃતિક વારસાથી જાગૃત કરવા માટે સતત પ્રયત્નશીલ રહેવાનો સંકલ્પ વ્યક્ત કર્યો હતો.
