બાબુ સોલંકી :- સુખસર
*ફતેપુરા તાલુકામાં સુખસર ખાતે વિશ્વ આદિવાસી દિવસની હર્ષોલ્લાસ ભર્યા વાતાવરણમાં ઉજવણી કરવામાં આવી*
*મોટી સંખ્યામાં આદિવાસી સમાજના સામાજિક આગેવાનો તેમજ રાજકીય આગેવાનોએ હાજર રહી વિશ્વ આદિવાસી દિવસ ઉજવ્યો*
*સુખસર ખાતે વિશ્વ આદિવાસી દિવસ ઉજવણીમાં દાહોદ જિલ્લા પંચાયત પ્રમુખ પર્વતસિંહ ડામોરની અધ્યક્ષતામાં ઉજવણી કરવામાં આવી*
સુખસર,તા.9
ફતેપુરા તાલુકાના સુખસર એસ્સાર પેટ્રોલ પંપ પાસે 129 ફતેપુરા વિધાનસભા ફતેપુરા તાલુકા અને સંજેલી તાલુકાના 9 ઓગસ્ટ વિશ્વ આદિવાસી દિવસની ઉજવણી ભારે
હર્ષોલ્લાસ ભર્યા વાતાવરણમાં દાહોદ જિલ્લા પંચાયતના પ્રમુખ પર્વત સિંહ ડામોરની અધ્યક્ષતામાં કરવામાં આવી હતી.આ પ્રસંગે ફતેપુરા વિધાનસભા મત વિસ્તારના ધારાસભ્ય રમેશભાઈ કટારા,દાહોદ જિલ્લા ભાજપ પ્રમુખ શંકરભાઈ અમલીયાર,નાયબ જિલ્લા વિકાસ અધિકારી રાઠવા,ફતેપુરા તાલુકા પંચાયતના પ્રમુખ ભરતભાઈ, સંજેલી તાલુકા પંચાયતના પ્રમુખ, ફતેપુરા મામલતદાર એન.એસ વસાવા, સંજેલી મામલતદાર,ફતેપુરા તાલુકા પંચાયતના અને સંજેલી તાલુકા પંચાયતના તાલુકા વિકાસ અધિકારી, તેમજ ખૂબ જ મોટી સંખ્યામાં આદિવાસી ભાઈ-બહેનો ઉપસ્થિત રહ્યા હતા.ઉપસ્થિત મહાનુભવોનું ઢોલ નગારા ફુલહાર કરી અને સ્મૃતિ ચિન્હ આપી તીર કામઠા આપી સ્વાગત કરવામાં આવ્યું હતું.કાર્યક્રમને મહાનુભાવો દ્વારા દીપ પ્રગટાવી ખુલ્લો મુકવામાં આવ્યો હતો.શાળાની વિદ્યાર્થીની-વિદ્યાર્થીઓ દ્વારા સાંસ્કૃતિક કાર્યક્રમો રજૂ કરવામાં આવ્યા હતા.વિશ્વ આદિવાસી દિવસની ઉજવણી કાર્યક્રમમાં પ્રસંગને અનુરૂપ મહાનુભાવો દ્વારા ઉદબોધન કરવામાં આવ્યું હતું.
સરકારની વિવિધ યોજનાઓ સમાજ સુરક્ષા,વૃદ્ધ સહાય, વિધવા સહાય,પશુપાલન વગેરે યોજનાઓના 26 લાભાર્થીઓને મંચ પરથી મહાનુભાવો હસ્તે કીટ વિતરણ કરવામાં આવ્યું હતું.સમગ્ર કાર્યક્રમ સંચાલન ફતેપુરા કન્યા પ્રાથમિક શાળાના આચાર્ય દિનેશભાઈ પટેલ દ્વારા કરવામાં આવ્યું હતું.જ્યારે આભાર વિધિ ફતેપુરા મામલતદાર એન.એસ.વસાવાએ કરેલ હતુ. આમ સુખસર ખાતે વિશ્વ આદિવાસી દિવસ ને હર્ષોલ્લાસ ભર્યા વાતાવરણમાં ઉજવણી કરવામાં આવી હતી.
