સંતરામપુરમાં વિજયાપંચમી અને દશેરા પર્વની ભવ્ય ઉજવણી: પ્રતાપપુરા મેદાન ખાતે ઉત્સાહભેર રાવણ દહન સંપન્ન

સંતરામપુરમાં વિજયાપંચમી અને દશેરા પર્વની ભવ્ય ઉજવણી: પ્રતાપપુરા મેદાન ખાતે ઉત્સાહભેર રાવણ દહન સંપન્ન

સંતરામપુર, તા. 20

આજ રોજ સમગ્ર દેશની સાથે સાથે સંતરામપુર નગરમાં પણ આસ્થા, ઉત્સાહ અને હર્ષોલ્લાસ સાથે વિજયાપંચમી એટલે કે દશેરાનું પર્વ ઉજવવામાં આવ્યું હતું. અસત્ય પર સત્યના વિજયના પ્રતીક સમાન આ પર્વ નિમિત્તે સંતરામપુર નગરપાલિકા દ્વારા પ્રતાપપુરા મેદાન ખાતે ભવ્ય રાવણ દહન કાર્યક્રમનું આયોજન કરવામાં આવ્યું હતું.

કાર્યક્રમની શરૂઆત સાંજે ઉત્સાહપૂર્ણ વાતાવરણમાં થઈ હતી. નગરના પ્રતાપપુરા મેદાન ખાતે આયોજિત આ ભવ્ય રાવણ દહન મહોત્સવમાં સંતરામપુરના રાજવી પરંજ્યાદિત્યસિંહજી પરમાર, ગુજરાત સરકારના મંત્રી અને સ્થાનિક ધારાસભ્ય કુબેરભાઈ ડિંડોર, નગરપાલિકાના પ્રમુખ શ્રીમતી નીશાબેન મોદી વિશેષ ઉપસ્થિત રહ્યા હતા. આ ઉપરાંત નગરપાલિકાના સન્માનનીય સભ્યશ્રીઓ, પદાધિકારીઓ તેમજ નગરના આગેવાનો અને અગ્રણીઓની ખાસ ઉપસ્થિતિ જોવા મળી હતી.

દશેરાના આ પાવન અવસરે રાવણ દહનને નિહાળવા માટે સંતરામપુર નગરની સ્થાનિક પ્રજા તેમજ આજુબાજુના ગ્રામ્ય વિસ્તારોમાંથી પણ મોટી સંખ્યામાં લોકો પ્રતાપપુરા મેદાન ખાતે ઉમટી પડ્યા હતા. મેદાનમાં માનવમેળા જેવું દ્રશ્ય સર્જાયું હતું. જય શ્રી રામના નાદ અને આતશબાજીના અદભુત પ્રકાશ વચ્ચે અહંકાર અને પાપના પ્રતીક સમાન રાવણના પૂતળાનું દહન કરવામાં આવ્યું હતું. આ નજારાએ ઉપસ્થિત તમામ લોકોમાં એક અલૌકિક ઉત્સાહ ભરી દીધો હતો.

સંતરામપુર નગરપાલિકા દ્વારા આયોજિત આ કાર્યક્રમ થકી નગરજનોએ પરંપરાગત રીતે દશેરા પર્વની ઉજવણીનો ભરપૂર આનંદ માણ્યો હતો અને શાંતિપૂર્ણ વાતાવરણમાં સમગ્ર ઉત્સવ સંપન્ન થયો હતો.