લીમખેડાના જાદા ગામમાં સિલિન્ડર બ્લાસ્ટ થતાં ભીષણ આગ: ત્રણ મકાનો સંપૂર્ણપણે બળીને ખાખ,
લાખો રૂપિયાનો સામાન ભસ્મીભૂત થયો, સદનસીબે જાનહાની ટળી
દાહોદ તા.26
લીમખેડા તાલુકાના જાદા ગામના પરમાર ફળિયામાં મંગળવારે બપોરે આશરે 2 વાગ્યે ગેસ સિલિન્ડર બ્લાસ્ટ થતાં ભીષણ આગ લાગી હતી. આ આગમાં ત્રણ મકાનો સંપૂર્ણપણે બળીને ખાખ થઈ ગયા હતા અને લાખો રૂપિયાનો સામાન ભસ્મીભૂત થયો હતો.
આ ઘટના માલા પરમારના મકાનમાં બની હતી. આગ એટલી વિકરાળ હતી કે તેણે તેમના ભત્રીજા અજીતભાઈ લલ્લુભાઈ પરમાર અને લક્ષ્મણભાઈ સબુરભાઈ પરમારના મકાનોને પણ પોતાની ઝપેટમાં લઈ લીધા હતા. ઘટના સમયે માલાભાઈ અને તેમની પત્ની પાર્વતીબેન ઘરમાં હાજર હતા, પરંતુ સદનસીબે તેઓ સમયસર બહાર નીકળી શક્યા હતા.
આગ લાગતાની સાથે જ આસપાસના લોકો દોડી આવ્યા હતા અને 122 હેલ્પલાઈન પર જાણ કરી હતી. દાહોદથી ફાયર બ્રિગેડની ટીમ તાત્કાલિક ઘટનાસ્થળે પહોંચી હતી અને ભારે જહેમત બાદ આગ પર કાબૂ મેળવ્યો હતો. આ ઘટનામાં કોઈ જાનહાનિ થઈ ન હતી, કારણ કે ઘરના સભ્યો અને પશુઓ સમયસર સુરક્ષિત સ્થળે ખસી ગયા હતા.આ ભીષણ આગમાં ત્રણેય પરિવારની ઘરવખરી, અનાજ, રોકડ રકમ, દાગીના તેમજ આધાર કાર્ડ, રેશનકાર્ડ અને બેંક પાસબુક જેવા મહત્વના દસ્તાવેજો પણ બળીને રાખ થઈ ગયા હતા. પ્રાથમિક અંદાજ મુજબ, આ ઘટનામાં લાખો રૂપિયાનું નુકસાન થયું છે.
ઘટનાની જાણ થતાં જ જાદા ગામના સરપંચ ભારતીબેન અને તલાટી કમ મંત્રી ઘટનાસ્થળે પહોંચ્યા હતા. તેમણે પંચનામું તૈયાર કરીને તાલુકા વિકાસ અધિકારીને રિપોર્ટ સુપરત કર્યો હતો. અસરગ્રસ્ત માલાભાઈ ગલાભાઈ પરમારે લીમખેડા પોલીસ સ્ટેશનમાં જાણવાજોગ ફરિયાદ નોંધાવી છે, અને પોલીસ તથા ફાયર વિભાગના અધિકારીઓ આગ લાગવાના કારણોની તપાસ કરી રહ્યા છે.
કડકડતી ઠંડીમાં આ ત્રણેય પરિવારો હાલ બેઘર બન્યા છે. સ્થાનિક લોકો અને પરિવારજનોએ સરકાર તરફથી તાત્કાલિક સહાય પૂરી પાડવાની માંગ કરી છે.
