ગરબાડા તાલુકાના નિમચઘાટીમાં મધ્ય પ્રદેશના વેપારી પર હેલ્મેટધારી બાઈક સવાર યુવકોએ કર્યું ફાયરિંગ:વેપારી ઈજાગ્રસ્ત:અન્ય એકનો બચાવ,પોલિસ તપાસમાં જોતરાઈ

 જીગ્નેશ બારીયા:- દાહોદ/વનરાજ ભુરીયા:-ગરબાડા

દાહોદ જિલ્લાના ગરબાડા તાલુકાના નિમચ ઘાટીમાં બની ચકચારી બનાવ
મધ્યપ્રદેશના રાણાપુરના અનાજના વેપારી પર બાઈક પર આવેલા હેલ્મેટધારી યુવકોએ બંદૂકથી કર્યું બે રાઉન્ડ ફાયર
ફાયરિંગમાં વેપારીના પીઠના ભાગે ગોળી વાગતા ઈજાગ્રસ્ત
વેપારીને સારવાર અર્થે ખાનગી હોસ્પિટલમાં ખસેડાયો:
ફાયરિંગની ઘટનામાં વેપારી સાથે આવેલા અન્ય એકનો બચાવ :પોલિસ તપાસમાં જોતરાઈ

દાહોદ તા.૨૨

દાહોદ જિલ્લાના ગરબાડા તાલુકાના ગુલબાર ગામે નીમચ ઘાટી તરફ આજરોજ મધ્યપ્રદેશના ઝાબુઆ જિલ્લાના રાણાપુર ગામના એક અનાજના વેપારી તથા તેમની સાથે પોતાનો માણસ એમ બંન્ને જણા એક મોટરસાઈકલ પર સવાર થઈ પસાર થઈ રહ્યાં હતા.તે સમયે એક મોટરસાઈકલ પર આવેલ બે અજાણ્યા ઈસમોએ આ વેપારી ઉપર બે રાઉન્ડ ફાયરીંગ કરતાં વેપારીને પીછના ભાગે ગોળી વાગતા ગંભીર ઈજાગ્રસ્ત વેપારીને ગરબાડા પોલીસ દ્વારા દાહોદની એક ખાનગી હોસ્પિટલમાં સારવાર અર્થે લાવવામાં આવ્યા હોવાનું જાણવા મળ્યું છે. આ ફાયરીંગ કયાં કારણોસર કરવામાં આવ્યું તેનું સાચુ કારણ હાલ જાણી શકાયું નથી પરંતુ પોલીસે આ દિશામાં તપાસનો ધમધમાટ આરંભ કરી દીધો છે ત્યારે બીજી તરફ ઘટનાને પગલે વિસ્તારમાં ચકચાર મચી જવા પામી છે.

મધ્યપ્રદેશના ઝાબુઆ જિલ્લામાં રાણાપુર ગામે રહેતા અનાજના વેપારી માણેકલાલ ઉકરજી રાઠોડ અને પોતાનો માણસ કિલુભાઈ બારીયા આ બંન્ને જણા આજરોજ વહેલી સવાર મધ્યપ્રદેશ અને ગુજરાતની બોર્ડર એવી દાહોદ જિલ્લાના ગરબાડાના નીમચ ઘાટી પરથી મોટરસાઈકલ પર સવાર થઈ પસાર થઈ રહ્યાં હતાં. વેપારી માણેકલાલ રાઠોડ મોટરસાઈકલની પાછળ બેઠા હતા અને તેઓનો માણસ કિલુભાઈ બારીયા મોટરસાઈકલ ચલાવી રહ્યાં હતાં. આ બંન્ને રાણાપુરથી નીમચ જઈ રહ્યાં હતાં. આ સમયે ગરબાડાના ગુલબાર ગામે એક મોટરસાઈકલ પર

સવાર થઈ આવેલા બે જણા જેમાંથી એકે માથે હેલ્મેટ અને એકે મોઢે રૂમાલ બાંધ્યો હતો. આ અજાણ્યા બંન્ને ઈસમો પૈકી એકે પોતાની પાસેની બંદુક વેપારી માણેકલાલ રાઠોડ સામે તાકી પહેલા પાછળથી એક રાઉન્ડ ફાયરીંગ કર્યું હતું અને ત્યાર બાદ મોટરસાઈકલ આગળ લાવી સામેથી ફાયરીંગ કર્યું હતું. આ બે રાઉન્ડ ફાયરીંગમાં પાછળ બેઠેલ વેપારી માણેકલાલ રાઠોડને

પાછળથી પીઠના ભાગે બંદુકની ગોળી વાગતાંની સાથે જ તેઓ સ્થળ પર લોહીલુહાણ હાલતમાં પડી ગયાં હતાં. ચાલુ મોટરસાઈકલ પરથી આ વેપારી અને તેમનો માણસ બંન્ને જમીન પર પડતાંની સાથે જ થોડીવાર કિલુભાઈને કંઈ સમજ પડી ન હતી કે શું બન્યું પરંતુ માણેકલાલ રાઠોડને લોહીથી લથબથ હાલતમાં જાેઈ તરતજ કીલુભાઈ દ્વારા ગરબાડા પોલીસનો સંપર્ક સાંધ્યો હતો અને ગરબાડા પોલીસ પણ તાત્કાલિક ઘટના સ્થળ પર દોડી ગઈ હતી. ગંભીર ઈજાગ્રસ્ત વેપારી માણેકલાલ રાઠોડને દાહોદની ખાનગી હોસ્પિટલ ખાતે સારવાર અર્થે ખસેડી દેવામાં આવ્યાં હતાં જ્યાં આ વેપારીની હાલત સુધારા પર બતાવવામાં આવી રહી છે.