![લો બોલો,પોલીસકર્મી જ બુટલેગરની કારનું પાયલોટીંગ કરતો હોવાનો ખુલાસો. લીમખેડામાં બુટલેગરોને દારૂની હેરાફેરીમાં મદદગારી કરનાર ડીવાયએસપીના ડ્રાઈવરની ધરપકડ,](https://dahodlive.com/wp-content/uploads/2024/07/IMG-20240717-WA0010-770x377.jpg)
રાજેશ વસાવે :- દાહોદ
લો બોલો,પોલીસકર્મી જ બુટલેગરની કારનું પાયલોટીંગ કરતો હોવાનો ખુલાસો.
લીમખેડામાં બુટલેગરોને દારૂની હેરાફેરીમાં મદદગારી કરનાર ડીવાયએસપીના ડ્રાઈવરની ધરપકડ,
કોલડીટેઈલમાં ભાંડો ફૂટ્યો, હવે જેલ ભેગો થયો.
દાહોદ તા.17
દાહોદ જિલ્લામાં પોલીસની વિદેશી દારૂ સામે ઝીરો ટોલરેન્સની નીતિ વચ્ચે પોલીસકર્મીની બુટલેગર સાથે સાંઠગાંઠ હોવાનું સામે આવ્યું છે. જેમાં એક અઠવાડિયા પહેલા દાહોદ એલસીબી પોલીસે લીમખેડા નગરમાંથી એક બોલેરો ફોર વ્હીલર ગાડીમાંથી 1,62,480/-ના વિદેશી દારૂના જથ્થા સાથે ગાડીમાં સવાર બે ઈસમોની અટકાયત કરી હતી જ્યારે એક ઈસમ નાસી જવામાં સફળ રહ્યો હતો. ત્યારે પોલીસે બોલેરો ગાડી મળી કુલ રૂા.6,62,480નો મુદ્દામાલ કબજે કરી આ અંગે તપાસનો ધમધમાટ આરંભ કરતાં પોલીસ તપાસમાં ચોંકાવનારી હકીકત સામે આવતાં દાહોદ જિલ્લા પોલીસ વિભાગમાં સ્તબ્ધતા સાથે ચકચાર મચી જવા પામી હતી. આ વિદેશી દારૂની હેરાફેરીમાં ખુદ લીમખેડાના ડીવાયએસપીના ડ્રાઈવર ભુપેન્દ્ર યશવંતસીંહ રાઠોડની ભુમિકામાં વિદેશી દારૂની હેરાફેરી થતી હોવાનું પોલીસ સામે ફલીત થતાં પોલીસ વિભાગ ખુદ અચંબામાં મુકાઈ ગઈ હતી. દાહોદ એલસીબી પોલીસે તાત્કાલિક ધોરણે ડીવાયએસપીના ડ્રાઈવર ભુપેન્દ્ર રાઠોડની અટકાયત કરી વધુ પૂછપરછ હાથ ધરી છે. જેમા ગત તા.06 જુલાઈના રોજ દાહોદ એલસીબી પોલીસને મળેલ બાતમીના આધારે લીમખેડાના વિશ્રામગૃહ પાસે રસ્તા પર નાકાબંધી કરી આવતાં જતાં તમામ નાના મોટા વાહનોની તલાસી હાથ ધરતાં હતાં તે સમયે ત્યાંથી બાતમીમાં દર્શાવેલ એક બોલેરો ફોર વ્હીલર ગાડી પસાર થતાં પોલીસ સાબદી બની હતી અને બોલેરો ફોર વ્હીલર ગાડી નજીક આવતાં સાથે તેને ચારેય તરફથી ઘેરી લઈ ગાડીમાં સવાર ચાલક રીતેશ મકનસીંહ ચૌહાણ અને તેની સાથેનો વિશાલ હિમસીંગ બારીયા (બંન્ને રહે. મધ્યપ્રદેશ)નાઓની પુછપરછ કરતાં પોલીસને સંતોષકારક જવાબ મળતાં પોલીસે બોલેરો ફોર વ્હીલર ગાડીની તલાસી લેતાં તેમાંથી વિદેશી દારૂની કુલ બોટલો નંગ.1104કિંમત રૂા.1,62,480/-ના પ્રોહી જથ્થા સાથે બોલેરો ફોર વ્હીલર ગાડીની કિંમત મળી પોલીસે કુલ રૂા.6,62,480/-નો મુદ્દામાલ કબજે કરી ઉપરોક્ત ઝડપાયેલ બંન્ને ઈસમોની પુછપરછ કરતાં તેઓની સાથે અન્ય એક ઈસમ લક્ષ્મણ ડામોર (રહે. લીમખેડા, તા. લીમખેડા, જિ. દાહોદ)નો પણ હોવાનું જણાવ્યું હતું અને તે દુરથી પોલીસને જાઈ નાસી ગયો હોવાનું ઉપરોક્ત બંન્ને ઈસમોને પોલીસ મથકે લાવી પુછપરછનો દૌર આરંભ કર્યો હતો અને તેઓના મોબાઈલ ફોનને ટ્રેસીંગ કરતાં તેમાં લીમખેડાના ડીવાયએસપી ભુપેન્દ્ર યશવંતસીંહ રાઠોડનું નામ અને નંબર સામેલ હોવાનું પોલીસ તપાસમાં સામે આવતાં ખુદ પોલીસ પણ આશ્ચર્યચકિત થઈ ગઈ હતી.પોલીસે ઝડપાયેલ ઉપરોક્ત બંન્ને ઈસમોની સઘન પુછપરછ કરતાં આ વિદેશી દારૂની હેરાફેરીમાં બુટલેગરોની સાથે ભુપેન્દ્ર રાઠોડની સાંઠગાંઠ હોવાનું સામે આવ્યું હતું અને હેરાફેરીમાં તેઓના વાહનોનું પાયલોટીંગ કરતો હોવાનું પણ પોલીસ તપાસમાં સામે આવ્યું હતું. આમ, ખુદ લીમખેડાના ડીવાયએસપીના ડ્રાઈવર ભુપેન્દ્ર રાઠોડની આ વિદેશી દારૂની હેરાફેરીમાં સંડોવણી બહાર આવતાં દાહોદ જિલ્લા પોલીસ બેડામાં ચકચાર સાથે ખળભળાટ મચી જવા પામ્યો છે. આ સંબંધે દાહોદ એલસીબી પોલીસે ડીવાયએસપીના ડ્રાઈવર ભુપેન્દ્રભાઈ રાઠોડની અટકાયત કરી આ સંબંધે જરૂરી રિપોર્ટ જિલ્લા પોલીસ વડા સહિતના સંબંધિત પોલીસ વિભાગને મોકલી આપી આગળની કાયદેસરની કાર્યવાહી હાથ ધરી છે