રાજેશ વસાવે :- દાહોદ
લીમખેડાના 14 અને ફતેપુરાના 2 મતદાન મથકમાં મોબાઇલ ટાવર ન પકડાતાં વાયરલેસ સેટ ઉભા કરાશે
વાયરલેસ સેટથી જ આંકડા અને સૂચનાની આપ-લે કરાશે..
દાહોદ તા.26
દાહોદ જિલ્લામાં લોકસભાની ચૂંટણીને લઈ તંત્ર સજ્જ છે. મતદાન મથકોને લઇને પણ તૈયારીઓ અંતિમ ચરણમાં ચાલી રહી છે. આ માટે અંતરિયાળ વિસ્તારમાં કેટલાક પડકારનો પણ સામનો કરવો પડી રહ્યો છે. આ સાથે જ ચૂંટણી પ્રક્રિયાને લઈને પણ કાર્યવાહી શાંતિપૂર્ણ રીતે ચાલે તેવા પ્રયાસો પણ કરવામાં આવી રહ્યા છે. જોકે કેટલાક વિસ્તારોમાં ચૂંટણીને વખતે કેટલાક પડકારોને પણ તંત્રએ ઝીલવાના છે. જેમાંનો એક પડકાર શેડો એરિયાની સમસ્યાનો છે. દાહોદ જિલ્લામાં ક્યાંક જંગલ વિસ્તાર છે તો ક્યાંક ડુંગરાળ વિસ્તાર પણ છે. આવા સ્થળોએ મોબાઇલ ફોનના નેટવર્કનો અભાવ છે. જેથી લોકસભાની ચુંટણી દરમિયાન આવા જંગલ વિસ્તાર કે ડુંગરાળ વિસ્તારમાં મતદાન મથક ઉપરથી મતદાનના આંકડા મેળવવા તેમજ અન્ય કોઇ પણ માહિતી મેળવવી હોય કે સંદેશો પહોંચાડવો હોય તો સમસ્યા સર્જાઈ શકે છે. જેથી જિલ્લા ચૂંટણી તંત્ર દ્વારા આવા મતદાન મથકોને અલગ તારવવામાં આવ્યા છે. દાહોદ ચૂંટણી પંચે આવા મતદાન મથકોની અલગ યાદી તૈયાર કરી તેમને ‘શેડો એરીયા’માં સ્થાન આપ્યું છે. જોકે અહીં સૌથી મોટા પડકાર પૈકી એક મોબાઈલ નેટવર્કનો સામે આવ્યો છે. જિલ્લાના 14 ગામના મતદાન મથકો ઉપર મોબાઇલ ટાવરનું નેટવર્ક નહીં હોવાને કારણે તેમને વાયરલેસ સિસ્ટમથી સજ્જ કરી સમગ્ર ચૂંટણી પાર પાડવાનું આયોજન ઘડી કાઢવામાં આવ્યુ છે. આંકડાકિય માહિતી અને કઈ પણ જરૂર પડે સંપર્ક સાધી શકાય માટે મતદાન મથકો પર ખાસ પોલીસ જવાન વોકીટોકી સજ્જ રાખવા સાથે આ મતદાન મથકોને વાયરલેસ સેટથી જોડવામાં આવનાર છે.
*દાહોદ જિલ્લાના કેટલાક ગામો નેટવર્ક વિહોણા.*
આજના સમયમાં મોબાઇલ જીવનનું એક અભિન્ન અંગ બની ગયુ છે. મોબાઇલમાં ઈન્ટરનેટ સુવિધાએ જીવન સરળ કરી દીધુ છે તો તેના ગેરફાયદા પણ એટલા જ છે. ત્યારે મધ્ય ગુજરાતના દાહોદના કેટલાક ગામ એવા છે કે જ્યાંના લોકો આજે પણ મોબાઇલ વાપરતાં નથી. મોબાઇલ નહીં વાપરવા પાછળના કારણોમાં અહીં આજ સુધી નેટવર્ક પહોંચી જ શક્યુ નથી. આ માટે
BSNL દ્વારા એક સર્વે કરાયો છે અને સરકારના સેચુરેશન પ્રોજેક્ટ અંતર્ગત હવે અહીં ટાવર નાખવાનું આયોજન ઘડી કાઢવામાં આવ્યુ છે.
*અલગ ચેનલ બનાવવી પડશે.*
વાયરલેસ સેટ ઉભા કરવા માટે એક અલગ ચેનલ બનાવવી પડશે. આ ચેનલનો નંબર અપાશે તેની ઉપરથી જ માહિતીની આપ-લે થશે. શેડો એરિયામાં મતદાન મથકે મુકવામાં આવેલા વાયરલેસ સેટ પોલીસ કંટ્રોલરૂમ અને ચૂંટણીના કંટ્રોલરૂમ સાથે કનેક્ટ હશે. ચૂંટણીના કંટ્રોલરૂમમાં પણ વાયરલેસ સેટ હેન્ડલ કરવા માટે એક ઓપરેટર બેસાડવો પડશે.
*દાહોદ જીલ્લાના મતદાન મથક ટાવર વિહોણા છે.*
ફતેપુરા તાલુકાના ગઢરા-1 અને ગઢરા-2 સાથે લીમખેડા તાલુકાનું સુરપુર-1, સુરપુર-2, આંબલિયા, મંડર-1, મંડર-2, સરજુમી-1, સરજુમી-2, કટારાની પાલ્લી, પામીવેલા, હીરાપુર, ફોફણ અને જાલિયાપાડામાં મોબાઇલ નેટવર્કની સમસ્યા હોવાને કારણે અહીં વાયરલેસ સેટ અને વોકીટોકીથી ચૂંટણીની કામગીરી પાર પાડવામાં આવશે
