દાહોદ જિલ્લામાં બે જુદા જુદા સ્થળોએ સર્જાયેલ માર્ગ અકસ્માતના બે બનાવોમાં બે વ્યક્તિઓના મોત
દાહોદ તા.૦૧
દાહોદ જિલ્લામાં બે જુદા જુદા સ્થળોએ સર્જાયેલ માર્ગ અકસ્માતના બે બનાવોમાં બે વ્યક્તિઓના મોત નીપજ્યાંનું જાણવા મળે છે.
માર્ગ અકસ્માતનો પ્રથમ બનાવ દેવગઢ બારીઆ તાલુકાના બામરોલી ગામે બનવા પામ્યો હતો જેમાં ગત તા.૩૦મી ઓગષ્ટના રોજ એક મોટરસાઈકલના ચાલકે પોતાના કબજાની મોટરસાઈકલ પુરઝડપે અને ગફલત ભરી રીતે હંકારી લાવી તે સમયે ત્યાંથી મોટરસાઈકલ લઈ પસાર થઈ રહેલ દેવગઢ બારીઆ તાલુકાના ભુવાલ ગામે પટેલ ફળિયામાં રહેતાં નરેશભાઈની મોટરસાઈકલ સાથે ધડાકાભેર અથડાવતાં નરેશભાઈ મોટરસાઈકલ પરથી જમીન પર ફંગોળાયા હતાં જેને પગલે તેઓને હાથે પગે માથાના ભાગે તેમજ શરીરે ગંભીર જીવલેણ ઈજાઓ પહોંચતો તેમનું મોત નીપજ્યું હતું. આ સંબંધે મૃતક નરેશભાઈના ભાઈ પ્રવિણભાઈ બાબુભાઈ પટેલે સાગટાળા પોલીસ મથકે ફરિયાદ નોંધાંવતાં પોલીસે ગુનો નોંધી આગળની કાયદેસરની કાર્યવાહી હાથ ધરી છે.
માર્ગ અકસ્માતનો બીજાે બનાવ સંજેલી તાલુકાના પ્રતાપપુરા ગામે બનવા પામ્યો હતો જેમાં ગત તા.૩૧મી ઓગષ્ટના રોજ સંજેલી તાલુકાના ચમારીયા ગામે બિલ્લી ફળિયામાં રહેતાં જસવંતભાઈ રૂપસીંગભાઈ બારીયાએ પોતાના કબજાની મોટરસાઈકલ પુરઝડપે હંકારી લાવતાં મોટરસાઈકલની વધુ પડતી ઝડપના કારણે મોટરસાઈકલ પરના સ્ટેરીંગ પરનો કાબુ ગુમાવી દેતાં મોટરસાઈકલ સ્લીપ ખાઈ ગઈ હતી અને જેને પગલે જશવંતભાઈ મોટરસાઈકલ પરથી ફંગોળાઈ જમીન પર પટકાતાં તેઓને હાથે પગે શરીરે અને માથાના ભાગે ગંભીર જીવલેણ ઈજાઓ પહોંચતાં તેમનું મોત નીપજ્યું હતું. આ સંબંધે મયુરભાઈ જશવંતસિંહ બારીયાએ સંજેલી પોલીસ મથકે ફરિયાદ નોંધાંવતાં પોલીસે ગુનો નોંધી આગળની કાયદેસરની કાર્યવાહી હાથ ધરી છે.
————————————————————
